muskurane se mudda.a kya hai
kah rahe hain tumhen hua kya hai
pairahan adl ka pahan aa.i
kaun mazlum hai jafa kya hai
shikve ke naam se hi barham hain
ye nahin puchhte gila kya hai
Daal di jis ke hausle ne sipar
vo tunak-arzu jiya kya hai
ḳhidmat-e-bandagan-e-haq ke siva
is ḳharabe men kimiya kya hai
sadgi men hazar purkari
bankpan men chhupa hua kya hai
izzat-e-nafs rakh sako mahfuz
aur is ke siva dua kya hai
saaf do-paT asman-o-zamin
daana ghafil hai asiya kya hai
Leave a Reply