ba-pas-e-ehtiyat-e-arzu ye bar-ha hua
nikal gaya qarib se vo haal puchhta hua
hijab-e-ruḳh lahak uTha agar bahut ḳhafa hua
jabhi to ham se pai-ba-pai qusur-e-mudda.a hua
shikayat-e-adm-e-tavajjohi baja sahi magar
nasib-e-ahl-e-anjuman nahin hai dil dukha hua
amin-e-raz-e-gham nahin hain dar-ḳhor-e-sitam nahin
palaT rahe hain aap hi pe aap ka kaha hua
uThengi meri vaj.h se jab aap par bhi ungliyan
kahenge phir to aap bhi ki vaqa.i bura hua
hujum-e-ma-siva se bach ke manzil-e-murad tak
pahunch gaya huun rahzanon se raah puchhta hua
kabhi kabhi ḳhulus-e-be-ta.alluqi bhi chahiye
nigah main ne pher li to us ka samna hua
zamana-e-ubur-e-inqalab ki bhi umr hai
na shaḳh-e-ashiyan rahi na ashiyan jala hua
nahin kuchh is se muḳhtalif giroh-e-bazm-e-raqs-o-mai
nikal gaya jo gulsitan men ḳhvab dekhta hua
ye kavish-e-umid-o-bim bhi hai lazzat-afrin
nazar udhar jami hui naqab-e-ruḳh uTha hua
ghalat-bayaniyon ke ahd-e-nau men ‘shad’ aarfi
mira kamal-e-fan ye hai ki sirf majra hua
Leave a Reply