ye dhoka ho na ho ummid hi ma.alum hoti hai
ki mujh ko duur se kuchh raushni ma.alum hoti hai
ḳhuda jaane kis andaz-e-nazar se tum ne dekha hai
ki mujh ko zindagi ab zindagi ma.alum hoti hai
isi ka naam shayad zindagi ne yaas rakkha hai
nafas ki jo khaTak hai aḳhiri ma.alum hoti hai
hua hai husn se kuchh aur aks-e-husn-e-ḳhud-dari
ḳhamoshi un ke honTon par hansi ma.alum hoti hai
na aaya haath mere baḌh ke jo daman inayat ka
ye mahrumi talab ki kuchh kami ma.alum hoti hai
jhukaya aaj dar par ai zahe baḳht-e-sar-afrazi
tiri rahmat qubul-e-bandagi ma.alum hoti hai
tujhe apne liye dast-e-karam ye janta huun main
ki tu hai jis qadar duniya vahi ma.alum hoti hai
kahan huun kis taraf huun main ḳhabar is ki nahin mujh ko
yahi gum-gashtagi kuchh agahi ma.alum hoti hai
sar-e-mauj nafas kashti-e-dil ko kya kahun ‘kaifi’
ubharti hai jahan tak Dubti ma.alum hoti hai
Leave a Reply