Ada Jafarey
vo lamha ki khamoshi-e-shab naghma-sara thi
kanon pe garan dil ke dhadakne ki sada thi
jis mod pe chhodi hai saharon ki tamanna
kahte hain bada qahr vahi laghzish-e-pa thi
kyuun aaj dhuan ban ke ufuq-ta-ba-ufuq hai
is saans men kaliyon ke chatakne ki sada thi
har lamha-e-betab ne dhundi hain panahen
gunji thi khamoshi tiri avaz to kya thi
har din ke sahife pe tira naam likha hai
har shab ki jabin tera nishan-e-kaf-e-pa thi
kya kahte ki honton pe bas ik harf-e-vafa tha
kya kijiye har saans jo taazir-e-vafa thi
uthte hue dekha hai dhuan atish-e-gul se
kya nikhat-e-barbad jale dil ki dua thi
kya janiye marna bhi rava hai ki nahin hai
takvin ke lab par mire jiine ki dua thi
Leave a Reply