Ehsan Danish
vafa.en kar ke jafaon ka gham uTha.e ja
isi tarah se zamane ko azma.e ja
kisi men apni sifat ke siva kamal nahin
jidhar ishara-e-fitrat ho sar jhuka.e ja
vo lau rabab se nikli dhuan uTha dil se
vafa ka raag isi dhun men gunguna.e ja
nazar ke saath mohabbat badal nahin sakti
nazar badal ke mohabbat ko azma.e ja
ḳhudi-e-ishq ne jis din se khol diin ankhen
hai ansuon ka taqaza ki muskura.e ja
nahin hai gham to mohabbat ki tarbiyat naqis
havadis aa.en to narmi se pesh aa.e ja
thi ibtida men ye tadib-e-muflisi mujh ko
ghulam rah ke ghulami pe muskura.e ja
badal na raah ḳhirad ke fareb men aa kar
junun ke naqsh-e-qadam par qadam baḌha.e ja
ummid o yaas men jiina hai ishq ka maqsud
isi maqam-e-muqaddas pe tilmila.e ja
chaman men fursat o taskin hai maut ka paigham
sukun pasand na kar ashiyan bana.e ja
yahi hai lutf-e-mohabbat yahi hai kaif-e-hayat
haqiqaton ki bina par fareb khaa.e ja
vafa ka ḳhvab hai ‘ehsan’ ḳhvab-e-be-tabir
vafa.en kar ke muqaddar ko azma.e ja
Leave a Reply