alam ki baat se azar-e-jan se kuchh nahin hota
vo aalam hai ki ehsas-e-ziyan se kuchh nahin hota
vaqar-e-gulsitan ki pasdari baat hai varna
chaman ke naam par husn-e-bayan se kuchh nahin hota
amal ki quvvat-e-tasḳhir se duniya badalti hai
shikayat-ha-e-jaur-e-asman se kuchh nahin hota
yaqin mohkam agar ho gardish-e-dauran badal Daale
guman kitna hi baḌh jaa.e guman se kuchh nahin hota
nazar sayyad ke halat par rakhna zaruri hai
faqat taz.in-e-shaḳh-e-ashiyan se kuchh nahin hota
jahan halat par tanqid hi karna zaruri ho
vahan ra.ana.i-e-husn-e-bayan se kuchh nahin hota
jahan dar-o-rasan ki baat mauzu-e-suḳhan Thahre
vahan ulfat ki rangin dastan se kuchh nahin hota
vahan aksar kalam-e-narm-o-shirin ḳhuub hota hai
ki aksar jis jagah tegh-o-sinan se kuchh nahin hota
ba-nam-e-ishq jazb-e-jan-faroshi ki zarurat hai
musalsal sajda-ha-e-astan se kuchh nahin hota
mohabbat men ik aisa vaqt bhi aata hai insan par
ki jab taskin-e-dil aram-e-jan se kuchh nahin hota
kisi bhi taur ab taskin ki surat nahin banti
kisi bhi mehrban na-mehrban se kuchh nahin hota
nasheman phunk hi Daala ‘qamar’ jab apne hathon se
ab aati hai to ab barq-e-tapan se kuchh nahin hota
Leave a Reply