Wo Is Tarah Se Meri Anjuman Mein lauT Aae

Kuldeep Kumar

vo is tarah se miri anjuman men lauT aa.e

bhaTak ke jaise parinda vatan men lauT aa.e

guzar ga.i thi koi titli mujh ko chhute hue

tamam rang mire pairahan men lauT aa.e

do-char din men hi thak ga.e the dasht-e-ruh men ham

so ek din usi shahr-e-badan men lauT aa.e

hamare jism men Dhalne lagi thi ḳhamoshi

bhala hua ki parinde chaman men lauT aa.e

jab aaya yaar to thoḌa sa uTh ke baiTh ga.e

yuun mil ke yaar se bazm-e-suḳhan men lauT aa.e

bas ek dard ne kya piiTh thapthapa.i ki phir

tamam husn-o-jamal ahl-e-fan men lauT aa.e

suna hai phir se mohabbat men log marne lage

ye kis zamane ke sikke chalan men lauT aa.e

hui jo shaam to phir raat kaTne ke liye

tamam log mire tan-badan men lauT aa.e