jab asman zamin par utarne lagta hai
to zindagi ka tasavvur bikharne lagta hai
kured leta huun tere ḳhayal se akasr
tiri vafa ka agar zaḳhm bharne lagta hai
jise fareb mila ho vafaon ke badle
vo shaḳhs apne hi saa.e se Darne lagta hai
main jab simaTta huun halat ki panahon men
mira vujud-e-shikasta bikharne lagta hai
zamana kyuun na miri raah ki rukavaT ho
mira junun bhi to had se guzarne lagta hai
uḌaan bharta huun jab bhi ḳhalaon se aage
na jaane kaun mire par katarne lagta hai
qadam baḌhata huun ‘salim’ hayat ki janib
to mere paanv men rasta Thaharne lagta hai
Leave a Reply