jiit kar bazi-e-ulfat ko bhi haara jaae
is tarah husn ko shishe men utara jaae
ab to hasrat hai ki barbad kiya hai jis ne
us ka divana mujhe kah ke pukara jaae
aap ke husn ki tausif se maqsad hai mira
naqsh-e-fitrat ko zara aur ubhara jaae
tum hi batlao ki jab apne hi begane hain
dahr men apna kise kah ke pukara jaae
zehn-e-khuddar pe ye baar hi ho jaata hai
ghair ke samne daman jo pasara jaae
kitni dushvar hai pabandi-e-ain-e-vafa
aah bhi lab pe agar aae to maara jaae
shab to kat jaegi yadon ke sahare ‘vasfi’
fikr is ki hai ki din kaise guzara jaae