apni ḳhushiyon pe to farhat bhi nahin kar sakte
ham to iz.har-e-masarrat bhi nahin kar sakte
hakim-e-vaqt hai ab ḳhud hi madad-gar-e-sitam
us se zulmon ki shikayat bhi nahin kar sakte
tum ko maan baap ne paida kiya paala posa
tum ki maan baap ki ḳhidmat bhi nahin kar sakte
is qadar TuuT ke chaha tha kabhi ham ne tujhe
ham tujhe chaah ke nafrat bhi nahin kar sakte
tum ne zulfon men kiya qaid miri nindon ko
kya riha kar ke inayat bhi nahin kar sakte
itne manus hain ham teri gali se janan
ham tire shahr se hijrat bhi nahin kar sakte
un ko ye zo.am ki vo ḳhud hain maballigh ai ‘zaki’
shaiḳh sahab ko nasihat bhi nahin kar sakte
ham asiran-e-rivayat ki ye mushkil hai ‘zaki’
ham rivayat se baghavat bhi nahin kar sakte
Leave a Reply