Har Kasi Ko Kab Bhala Yun Mustarad Karta Hun Main

Iqbal Sajid

har kasi ko kab bhala yuun mustarad karta huun main

tu hai ḳhush-qismat agar tujh se hasad karta huun main

bughz bhi siine men rakhta huun amanat ki tarah

nafraten karne pe aa ja.un to had karta huun main

koi apne-ap ko manvane vaala bhi to ho

manne men kab kasi ke radd-o-kad karta huun main

kuchh shu.uri sat.h par kuchh la-shu.uri taur par

kar-e-fikr-o-fan men ab sab ki madad karta huun main

is liye mujh se ḳhafa hain ahl-e-gulshan aj-kal

rang jhuTlata huun ḳhushbu mustarad karta huun main

mere jazbon se bachao nek-dil logo mujhe

roz o shab in bad-ma.ashon ki madad karta huun main

dusron ke vaste likkha hua lagta hai jhuuT

apni sachcha.i ko akasr aap rad karta huun main

rang par aa.i hui hai ab junun-ḳhezi meri

roz o shab tauhin-e-arbab-e-ḳhirad karta huun main

tauq gardan men pahanta huun lahu ki dhaar ka

ḳhalq ko hairan ‘sajid’ zad-ba-zad karta huun main