Athar Nafees
lamhon ke azaab sah raha huun
main apne vajud ki saza huun
zaḳhmon ke gulab khil rahe hain
ḳhushbu ke hujum men khaḌa huun
is dasht-e-talab men ek main bhi
sadiyon ki thaki hui sada huun
is shahr-e-tarab ke shor-o-ghul men
tasvir-e-sukut ban gaya huun
benam-o-numud zindagi ka
ik bojh uTha.e phir raha huun
shayad na mile mujhe riha.i
yadon ka asiir ho gaya huun
ik aisa chaman hai jis ki ḳhushbu
sanson men basa.e phir raha huun
ik aisi gali hai jis ki ḳhatir
darmanda ku-ba-ku raha huun
ik aisi zamin hai jis ko chhu kar
taqdis-e-haram se ashna huun
ai mujh ko fareb dene vaale
main tujh pe yaqin kar chuka huun
main tere qarib aate aate
kuchh aur bhi duur ho gaya huun
Leave a Reply