Tez Mujh Par Jo Sitamgar Ki Chhuri Hoti Hai

tez mujh par jo sitamgar kī chhurī hotī hai

kījiye kyā ki lagī dil kī burī hotī hai

man.a kartā hai taḌapne se qafas meñ sayyād

naale kartā huuñ to gardan pe chhurī hotī hai

har badī kartī hai insān ko duniyā meñ halāk

sam-e-qātil hai vo aadat jo burī hotī hai

ahl-e-dil ishq meñ dam maar sakeñ kyā mumkin

rag-e-jāñ ke liye har saañs chhurī hotī hai

baiTh kyuuñ bāda-kashoñ meñ ki hoñ gum hosh-o-havās

sohbat-e-ahl-e-ḳharābāt burī hotī hai

Leave a Comment