Is Ka Nahin Hai Gham Koi Jaan Se Agar Guzar Gae

Hazin Ludhianvi

is ka nahin hai gham koi jaan se agar guzar ga.e

dikh ki andheri qabar par ham bhi charagh dhar ga.e

shan-o-shikoh kya hue qaisar-o-jam kidhar ga.e

taḳht ulaT ulaT ga.e taaj bikhar bikhar ga.e

fikr-e-ma.ash ne sabhi jazbon ko sard kar diya

saḌkon pe din guzar gaya ho ke niDhal ghar ga.e

tundi-e-sail-e-vaqt men ye bhi hai koi zindagi

sub.h hui to ji uThe raat hui to mar ga.e

gard-e-safar men kho ga.e aise hazaron rah-rau

raah men jo Thahar ga.e andhiyon se jo Dar ga.e

aap ka to maqam tha dil ke buland taḳht par

aap ko aaj kya hua dil se mire utar ga.e

khil ke rahenge dekhna chaar su raushni ke phuul

raat ke dasht ki taraf naqsh-gar-e-sahar ga.e

ḳhaak men teri mil ga.i ‘faiz’ ke jism ki ziya

ab to dayar-e-mahvashan! qarz tamam utar ga.e