ḳhushk hain ye sabhi samundar chal
tishnagi ho ga.i muqaddar chal
rog mat ashna.iyon ke baḌha
chhoḌ avargi miyan ghar chal
zarra-zarra na ḳhud bikhar aisa
jam.a kar apne aap ko ghar chal
hain haqa.eq ke marhale darpesh
apne ḳhvabon ka bandh bistar chal
peT ke mas.ale bulate hain
kar-ḳhane dukan daftar chal
zindagi rasta hai sho.alon ka
daman-e-afiyat bacha kar chal
bhuul mat apni haisiyat ‘rahi’
apni hadd-e-rasa ke andar chal
Leave a Reply