Ye chhoTa Sa Makan Baghiya Lagane Kaun Deta Hai

ye chhoTā sā makāñ baġhiyā lagāne kaun detā hai

dar-o-dīvār par sabza ugāne kaun detā hai

kabhī nāzāñ the ham aañsū bahāne kaun detā hai

magar ai chashm-e-nam ab muskurāne kaun detā hai

mirī āñkhoñ ko ye sapne suhāne kaun detā hai

vo aa.egā dilāse dil ko jaane kaun detā hai

pata chaltā hai kaise mere un ke chhup ke milne kā

ḳhabar tujh ko hamārī ai zamāne kaun detā hai

nahīñ aanā nahīñ aanā yahī zid hai yahī zid hai

vo aa to jaa.eñ phir dekhūñ ki jaane kaun detā hai

tumheñ dil meñ basā rakhā hai merī sādgī dekho

zamāne meñ kisī ko sar chhupāne kaun detā hai

ḳhud apne dil se kah lete haiñ tanhā.ī meñ ġham apnā

tumhāre sāmne dukhḌe sunāne kaun detā hai

Leave a Comment