Nazrana

Kaifi Azmi

tum pareshan na ho, bab-e-karam va na karo

aur kuchh der pukarunga chala jaunga

usi kuche men jahan chand uga karte hain

shab-e-tarik guzarunga, chala jaunga

rasta bhuul gaya, ya yahi manzil hai miri

koi laaya hai ki khud aaya huun maalum nahin

kahte hain husn ki nazren bhi hasin hoti hain

main bhi kuchh laaya huun, kya laaya huun maalum nahin

yuun to jo kuchh tha mire paas main sab bech aaya

kahin inaam mila, aur kahin qimat bhi nahin

kuchh tumhare liye ankhon men chhupa rakkha hai

dekh lo aur na dekho to shikayat bhi nahin

ek to itni hasin dusre ye araish

jo nazar padti hai chehre pe thahar jaati hai

muskura deti ho rasman bhi agar mahfil men

ik dhanak tuut ke sinon men bikhar jaati hai

garm boson se tarasha hua nazuk paikar

jis ki ik aanch se har ruuh pighal jaati hai

main ne socha hai ki sab sochte honge shayad

pyaas is tarah bhi kya sanche men dhal jaati hai

kya kami hai jo karogi mira nazrana qubul

chahne vaale bahut, chaah ke afsane bahut

ek hi raat sahi garmi-e-hangama-e-ishq

ek hi raat men jal marte hain parvane bahut

phir bhi ik raat men sau tarah ke mod aate hain

kaash tum ko kabhi tanhai ka ehsas na ho

kaash aisa na ho ghere rahe duniya tum ko

aur is tarah ki jis tarah koi paas na ho

aaj ki raat jo meri hi tarah tanha hai

main kisi tarah guzarunga chala jaunga

tum pareshan na ho, bab-e-karam va na karo

aur kuchh der pukarunga chala jaunga