Wasi Shah
maan le ab bhi miri jan-e-ada dard na chun
kaam aati nahin phir koi dua dard na chun
aur kuchh der men mujh ko chale jaana hoga
aur kuchh der mujhe ḳhvab dikha dard na chun
ek bhi dard na kam hoga ka.i sadiyon men
ab bhi kahta huun tujhe vaqt bacha dard na chun
vo jo likkha hai kisi taur nahin Tal sakta
aa mire dil men koi diip jala dard na chun
main tire lams se mahrum na rah ja.un kahin
aḳhiri baar mujhe ḳhud se laga dard na chun
ab to ye reshmi poren bhi chhidi jaati hain
ḳhud ko ab baḳhsh bhi de zulm na Dah dard na chun
ye nahin honge to khaa.e nahin ho ja.unga main
mere zaḳhmon se koi giit bana dard na chun
kuchh na dega ye masa.il se ulajhte rahna
chhoḌ sab kuchh miri banhon men sama dard na chun
Leave a Reply