iid ka din hua karti thi har ik raat mujhe
haa.e vo vaqt ki raas aati thi barsat mujhe
kuchh bhi ho tauba mohabbat se na hogi vaa.iz
jan-o-dil donon se pyari hai miri baat mujhe
jagmagati tiri ankhon ki qasam furqat men
baḌe dukh deti hai ye taron bhari raat mujhe
dil ne un ko bhi kiya chashm-e-muravvat ke supurd
aap se the bhi jo kuchh shikva shikayat mujhe
dukh bhara huun mire nalon se hazar kar naseh
buri ma.alum na ho jaa.e koi baat mujhe
jitne din ziist ke baaqi hain nichhavar kar duun
phir jo mil jaa.e javani ki koi raat mujhe
abr-e-baran ke maze luTun main kyunkar ‘manzar’
dam bhi lene de miri ankhon ki barsat mujhe
Leave a Reply