tire baghair hai ab ye miri ḳhushi ai dost
ḳhushi mile na mujhe umr bhar kabhi ai dost
tira ḳhayal tha maqsud-e-zindagi apna
tiri talab thi andhere men raushni ai dost
ab is ke ba.ad kise aarzu hai jiine ki
tiri nigah-e-karam tak thi zindagi ai dost
tiri juda.i men aksar ye sochta huun main
na jaane kaise kaTegi ye zindagi ai dost
jo tujh ko DhunDhna chaha to kya gunah kiya
tiri talash koi jurm to na thi ai dost
hansa bhi huun main bahut is hayat-e-fani men
ab aa.egi na labon par kabhi hansi ai dost
baḌa sitam hai mile tujh se tere ‘shariq’ ko
tire jamal se mahrum zindagi ai dost
Leave a Reply