Poet
ghuncha-o-gul men tazgi na rahi
ab baharon men dilkashi na rahi
ab to qindil-e-dil karo raushan
bazm-e-hasti men raushni na rahi
jo bhi karna hai aaj hi kar le
kal ye duniya rahi rahi na rahi
vo gale mil ke kya hue ruḳhsat
zindagi jan-e-zindagi na rahi
kar rahe hain vo ehtimam-e-gham
ab to meri ḳhushi ḳhushi na rahi
mai-kada ho gaya tah-o-bala
koi shai mere kaam ki na rahi
saara mai-ḳhana kashmakash men hai
tarz-e-‘maikash’ men dilkashi na rahi
Leave a Reply