Poet
ai dil ab ishq ki lai-goi aur chaugan men aa
be-ḳhatar Thok ke ḳham jang ke saman men aa
ḳhauf ghammaz raqibon ka na kar kuchh hargiz
ho ke raazi ba-raza vaqt hai maidan men aa
fursat is vaqt ghanimat hai nikal zulmat se
suljh kar zulf se ruḳhsar-e-daraḳhshan men aa
gul-e-ruḳhsara ka nazzara tu kar ankhen khol
angbin chakhne ko phir dil lab-e-ḳhandan men aa
ba.ad us ke jo agar samjhe munasib ai dil
qaid hone ke ta.iin chah-e-zanaḳhdan men aa
harza phirne se tire gosha-nashini behtar
vahm-o-shak aur guman chhoḌ ke iqan men aa
vasl-o-hijrat ke ta.iin ek samajh ‘afridi’
aql hai kuchh bhi agar sohbat-e-rindan men aa
Leave a Reply