main na hone se hua yaani badi taqsir ki
kimiya-gar ne miri miti magar iksir ki
un dinon aaya tha tu jab hausla darkar tha
khair ho teri ki tu ne tirgi tanvir ki
aur socha aur socha aur socha aur phir
us khuda-e-lam-yazal ne aur hi taqdir ki
ashiqan suniye ba-gosh-e-hosh meri dastan
dastan kuchh bhi nahin yaron ne bas tash.hir ki
main to mitti ho raha tha ishq men lekin ‘ata’
aa gai mujh men kahin se be-dimaghi ‘mir’ ki
Leave a Reply