nahin jaane hai vo harf-e-sataish barmala kahna
magar nazron hi nazron men vo is ka vah-va kahna
sar-e-mahfil kare rusva mira be-sakhta kahna
mire fankar ye nazuk-khayali vaah kya kahna
mire naraz shanon ko thapak kar bar-ha kahna
chalo chhodo gile-shikve kabhi maano mira kahna
koi masrufiyat hogi vagarna maslahat hogi
na is paiman-faramoshi se us ko bevafa kahna
vafa to khair kya hoti chalo ye bhi ghanimat hai
miri be-bastagi ko khud raqibon ko bura kahna
Leave a Reply