barha ThiThka huun ḳhud bhi apna saaya dekh kar
log bhi katrae kya kya mujh ko tanha dekh kar
mujh ko is ka gham nahin sailab men ghar bah gae
muskuraya huun main be-mausam ki barkha dekh kar
ret ki divar men shamil hai ḳhun-e-zist bhi
ai havao soch kar ai mauj-e-dariya dekh kar
apne hathon apni ankhen band karni paḌ gaiin
nighat-e-gul ke jilau men gard-e-sahra dekh kar
mere chehre par ḳharashen hain lakiren haath ki
meri qismat paḌhne vaale mera chehra dekh kar
Leave a Reply