Munawwar Rana
ghar men rahte hue ghairon ki tarah hoti hain
ladkiyan dhaan ke paudon ki tarah hoti hain
ud ke ik rose bahut duur chali jaati hain
ghar ki shakhon pe ye chidiyon ki tarah hoti hain
sahmi sahmi hui rahti hain makan-e-dil men
arzuen bhi gharibon ki tarah hoti hain
tuut kar ye bhi bikhar jaati hain ik lamhe men
kuchh umiden bhi gharondon ki tarah hoti hain
aap ko dekh ke jis vaqt palatti hai nazar
meri ankhen miri ankhon ki tarah hoti hain
Leave a Reply