aa kidhar hai tu saqi-e-makhmur
bhar ke de jam-e-bada-e-angur
koi jam-e-sharab aisa pila
jis se shadi kare dil-e-ranjur
ranj-e-geti se dil mukaddar hai
bhar ke de mai se saghar-e-billor
aaj yaum-e-zafar do-shohra hai
talib-e-aish hai dil-e-jamhur
maar kar dev-e-bad ko lanka se
raam aae muzaffar-o-mansur
ram-o-sita avadh men jab aae
dil-e-kaushalya hua masrur
takht-e-lanka diya vibhishan ko
jab hua qatl ravan-e-maqhur
dil sumitra ka bhi hua khursand
dekha lachhman ka jab rukh-e-pur-nur
kaash dashrath bhi zinda hote aaj
tha na ishvar ko ye magar manzur
doston ko ye din mubarak ho
ho mubarak unhen ye aish-o-surur
saal puchhe agar koi kah do
aaj maara hai ravan-e-maghrur
Leave a Reply