dayar-e-husn men pabandi-e-rasm-e-vafa kam hai
bahut kam hai bahut kam hai ba-hadd-e-intiha kam hai
jafa-e-be-sabab kam hai ki jaur-e-na-rava kam hai
tiri be-dad ai zalim na hone par bhi kya kam hai
kamal-e-dilbari men kaun si teri ada kam hai
na shoḳhi kam haya se hai na shoḳhi se haya kam hai
ba-kasrat sair ki hai har ravish gulzar-e-alam ki
yahan rang-e-mohabbat hai bahut bu-e-vafa kam hai
ḳhuda ke naam par dast-o-gireban hain ḳhuda vaale
bahut hai jis qadar zikr-e-ḳhuda ḳhauf-e-ḳhuda kam hai
azal se hoti aa.i hai abad tak hoti ja.egi
gunahgar-e-vafa par jis qadar bhi ho jafa kam hai
dua ko haath kyuun uTThe mire timar-daron ke
zaban se kyuun nahin kahte ki ummid-e-shafa kam hai
rahe kyunkar na bad-zan vo shah-e-husn ai ‘vafa’ mujh se
baḌa nadan hai sunta bahut hai dekhta kam hai
Leave a Reply