Muneer Ahmad Jami
dil men apne husn-e-alamgir dekh
aa.ine men yaar ki tasvir dekh
kah rahe hain vo bana kar zulf ko
mujriman-e-ishq ki zanjir dekh
tujh ko aana hi paḌa tha le jigar
dekh meri aah ki tasir dekh
ḳhat peshani ka bhi miTta hai kahin
ḳhama-e-be-dast ki tahrir dekh
un ke divanon men ham bhi ja mile
mil ga.i zanjir se zanjir dekh
un ke zer-e-hukm saari ka.enat
kaisi hai ye qaid-e-be-zanjir dekh
dekh hi lena hai ‘za.iq’ ko agar
har ghazal hai us ki ik tasvir dekh
Leave a Reply