gham nahin naz-e-husn hai husn ke naaz uTha.e ja
ai dil-e-mubtala-e-gham gham men bhi muskura.e ja
husn hai ishq-e-afrin husn pe dil luTa.e ja
ishq ko dard-e-dil bana dard ko dil bana.e ja
jalva-ba-jalva gar nahin parda-ba-parda aa.e ja
dil men mire sama.e ja ruuh men jagmaga.e ja
shorish-e-ka.enat men gham ko ḳhushi bana.e ja
hans mire ansuon men tu aah men muskura.e ja
taron men jagmaga.e ja chand men muskura.e ja
duur se koi naghma-e-ruh-faza suna.e ja
zabt ba-qadr-e-zarf hai zarf ba-qadr-e-shauq hai
tu abhi samne na aa shauq abhi baḌha.e ja
bahama tark-e-rasm-o-rah kuchh to ho iltifat bhi
tu mujhe bhuul ja magar yaad mujhe tu aa.e ja
husn se baḌh ke bad-guman ishq hai apne aap se
main abhi mutma.in nahin tu mujhe azma.e ja
sirf jabin-e-shauq ho aur kisi ka astan
sajde bhi darmiyan na huun sajdon ko bhi miTa.e ja
bazm-e-nashat-e-ka.enat mujh pe hai ḳhanda-zan hanuz
ḳhalvat-e-gham men tu abhi aur mujhe rula.e ja
ab na vo ‘bismil’ aur na tu ab na vo dil na aarzu
ab to ḳhuda ke vaste yaad use na aa.e ja
Leave a Reply