mira hai kaun dushman meri chahat kaun rakhta hai
isi par sochte rahne ki fursat kaun rakhta hai
makinon ke taalluq hi se yaad aati hai har basti
vagarna sirf bam-o-dar se ulfat kaun rakhta hai
nahin hai nirkh koi mere in ashar-e-taza ka
ye mere khvab hain khvabon ki qimat kaun rakhta hai
dar-e-khema khula rakkha hai gul kar ke diya ham ne
so izn-e-am hai lo shauq-e-rukhsat kaun rakhta hai
mare dushman ka qad is bhiid men mujh se to uncha ho
yahi men dhundhta huun aisi qamat kaun rakhta hai
hamare shahr ki raunaq hai kuchh mashhur logon se
magar sab jante hain kaisi shohrat kaun rakhta hai
Leave a Reply