bas ek baar kisi ne gale lagaya tha
phir us ke baad na main tha na mera saaya tha
gali men log bhi the mere us ke dushman log
vo sab pe hansta hua mere dil men aaya tha
us ek dasht men sau shahr ho gae abad
jahan kisi ne kabhi karvan lutaya tha
vo mujh se apna pata puchhne ko aa nikle
ki jin se main ne khud apna suragh paaya tha
mire vajud se gulzar ho ke nikli hai
vo aag jis ne tira pairahan jalaya tha
mujhi ko tana-e-gharat-gari na de pyare
ye naqsh main ne tire haath se mitaya tha
usi ne ruup badal kar jaga diya akhir
jo zahr mujh pe kabhi niind ban ke chhaya tha
‘zafar’ ki khaak men hai kis ki hasrat-e-tamir
khayal-o-khvab men kis ne ye ghar banaya tha
Leave a Reply