ashuftagi phir aaj mana le ga.i mujhe
ik bu-e-rah-guzar-e-bala le ga.i mujhe
jaana tha main ne main tire qadmon ki dhuul huun
duniya samajh ke phuul uTha le ga.i mujhe
charagaron ko meri hava tak na mil saki
chupke se koi sham-e-bala le ga.i mujhe
tujh ko pukarna tha na dasht-e-talab men dost
duur aur tujh se teri sada le ga.i mujhe
ab anjuman men baiTha huun gum-sum kahun bhi kya
duzdida ik udasi chura le ga.i mujhe
rakhta bhi kaun pyase savalon ki aabru
bas meri ḳhamushi hi nibha le ga.i mujhe
us men kisi talab ka ‘musavvir’ na tha saval
mai-ḳhane ek laghzish-e-pa le ga.i mujhe
Leave a Reply