Rashmi Saba
zamane valon ke chehron pe kitne Dar nikle
falak ki chaah men jab bhi zamin ke par nikle
bhaTakna chahun bhi to duniya muḳhtasar nikle
jidhar baḌha.un qadam teri rahguzar nikle
yashodhra ki tarah niind men chhali ga.i to
main chahti huun mire ḳhvab se ye Dar nikle
kabhi ḳhayal men socho vo raat ka chehra
ki jis ghaḌi vo dua karti hai sahar nikle
ki jis pe chalte hue ḳhud se mil sakun main ‘saba’
kahin se kaash koi aisi rahguzar nikle
paḌav hoti hui manzilen na thiin manzur
so haar thak ke ‘saba’ ham bhi apne ghar nikle
Leave a Reply