chot nai hai lekin zakhm purana hai
ye chehra kitna jana-pahchana hai
saari basti chup ki dhund men duubi hai
jis ne lab khole hain vo divana hai
aao us suqrat ka istiqbal karen
jis ne zahr ke ghunt ko amrit jaana hai
ik ik kar ke sab panchhi dam tod gae
bhari bahar men bhi gulshan virana hai
apna padav dasht-e-vafa be-ab-o-giyah
tum ko to do chaar qadam hi jaana hai
kal tak chahat ke anchal men lipta tha
aaj vo lamha khvab hai ya afsana hai
Leave a Reply