unhen kyuun phuul dushman eid men pahna.e jaate hain
vo shaḳh-e-gul ki surat naaz se bal khaa.e jaate hain
agar ham se ḳhushi ke din bhi vo ghabra.e jaate hain
to kya ab eid milne ko farishte aa.e jaate hain
vo hans kar kah rahe hain mujh se sun kar ghair ke shikve
ye kab kab ke fasane eid men dohra.e jaate hain
na chheḌ itna unhen ai va.ada-e-shab ki pashemani
ki ab to eid milne par bhi vo sharma.e jaate hain
‘qamar’ afshan chuni hai ruḳh pe us ne is saliqe se
sitare asman se dekhne ko aa.e jaate hain
Leave a Reply