Hameed Almas
rakh diya hai miri dahliz pe patthar kis ne
aur phir bheje hain aaseb ke lashkar kis ne
shajar-e-tar na yahan barg-e-shanasa koi
is qarine se sajaya hai ye manzar kis ne
kashtiyan kaise nikal pa.engi giili tah se
pi liya chand hi sanson men samundar kis ne
peshva.i ke liye bint-e-saba aa.i hai
pa-shikasta huun banaya hai qad-avar kis ne
meri basti bhi hui sho.ala-zani men shamil
la ke chhoḌe hain yahan aag ke paikar kis ne
Leave a Reply