Bulawa Kaun Sa Koh-E-Nida Mein Rakkha Hai

Krishna Kumar Toor

bulava kaun sa koh-e-nida men rakkha hai

charagh ham ne jo apna hava men rakkha hai

vo chahe baḳhsh de zillat ki sarfaraz kare

bas ik yaqin hai jo ham ne ḳhuda men rakkha hai

adam vajud men bharti hai ik rag-e-maujud

ab aur is ke siva kya dua men rakkha hai

na ḳhud-shanasi agar ho to kya nashat-e-ishq

raqam na ho to kya harf-e-nava men rakkha hai

safar na ho to ye lutf-e-safar hai be-ma.ani

badan na ho to bhala kya qaba men rakkha hai

jo dekho ghaur se kuchh kam nahin hai ye bhi ‘tur’

ik iztirar sukun-e-hava men rakkha hai