jhamakte jhumte mausam ka dhoka kha raha huun main
bahut lahrae hain badal magar pyasa raha huun main
hui jab dhuup ki barish mire sar par to kya hoga
darakhton ke ghane sayon men bhi sanvla raha huun main
vahi kuchh kar raha huun jo kiya mere buzurgon ne
nae zehnon pe apne tajrbe barsa raha huun main
ye tohmat khaak tohmat hai mire ham-jurm ham-sayo
tumhari umr men tum se kahin rusva raha huun main
khayal aata hai bazaron ki raunaq dekh kar mujh ko
bhare dariya men tinka ban ke bahta ja raha huun main
tiri aghosh chhuti to mili vo bad-dua mujh ko
ki ab apni hi banhon men simatta ja raha huun main
‘qatil’ ab tak nadamat hai mujhe tark-e-mohabbat par
zara sa jurm kar ke aaj bhi pachhta raha huun main
Leave a Reply