Akbar Allahabadi
dasht-e-ghurbat hai alalat bhi hai tanhai bhi
aur un sab pe fuzun badiya-paimai bhi
khvab-e-rahat hai kahan niind bhi aati nahin ab
bas uchat jaane ko aai jo kabhi aai bhi
yaad hai mujh ko vo be-fikri o aghaz-e-shabab
sukhan-arai bhi thi anjuman-arai bhi
nigah-e-shauq-o-tamanna ki vo dilkash thi kamand
jis se ho jaate the raam ahu-e-sahrai bhi
ham sanam-khana jahan karte the apna qaaim
phir khade hote the vaan huur ke shaidai bhi
ab na vo umr na vo log na vo lail o nahar
bujh gai taba kabhi josh pe gar aai bhi
ab to shubhe bhi mujhe dev nazar aate hain
us zamane men pari-zad thi rusvai bhi
kaam ki baat jo kahni ho vo kah lo ‘akbar’
dam men chhin jaegi ye taqat-e-goyai bhi
Leave a Reply