jan-e-gulshan jo hue vo gul-e-tar dekhe hain
ham ne mausam ke hasin rang kidhar dekhe hain
tum se milte hain jo ham un ki tasalli ke liye
varna aise to bahut sham-o-sahar dekhe hain
alam-e-be-sar-o-saman nahin guzra tum par
tum ne kab aag men jalte hue ghar dekhe hain
hakim-e-vaqt dilon par thi hukumat un ki
ham ne aise bhi ka.i ḳhak-basar dekhe hain
apne hathon hi miTa dete hain ḳhud apna nishan
aise insan nahin dekhe magar dekhe hain
in gali-kuchon pe ye vaqt bhi aaya ‘manzar’
shahar valon ke badan ḳhuun men tar dekhe hain
Leave a Reply