Poet
mujh se azurda jo us gul-ru ko ab paate hain log
aur hi rangat se kuchh kuchh aa ke farmate hain log
jab se jaana band mera ho gaya ai hamdamo
tab se un ke ghar men har har tarah ke aate hain log
mere ah-e-sard ki tasir us ke dil men dekh
haa.e kis kis tarah mujh par us ko garmate hain log
jab vo ghabrate the mujh se tab the un ke ghar ke ḳhush
ab jo vo ḳhush hain to un ke ghar ke ghabrate hain log
koi samjhao unhen bahr-e-ḳhuda ai momino
us sanam ke ishq men jo mujh ko samjhate hain log
roz-e-hijran to dikhaya sau farebon se mujhe
dekhiye ab aur kya kya haa.e dikhlate hain log
jo lagate the bujhate the hamesha un se aah
vo hi ab na-char ‘ghamgin’ mujh se sharmate hain log
Leave a Reply