tha harf-e-shauq said hua kaun le gaya
main jis ko sun sakun vo sada kaun le gaya
ik main hi jama-posh tha uryaniyon ke biich
mujh se miri aba o qaba kaun le gaya
ehsas bikhra bikhra sa haara hua badan
chaḌhti hararton ka nasha kaun le gaya
baton ka husn hai na kahin shoḳhi-e-bayan
shahr-e-nava se harf o sada kaun le gaya
main kab se huun asiir sarabon ke jaal men
niile samundaron pe ghaTa kaun le gaya
mai-ḳhana chhoḌ ghar ki fazaon men aa ga.e
ham se mata-e-laghzish-e-pa kaun le gaya
main jab na tha to mujh pe bahut qahqahe lage
ahbab se sirisht-e-vafa kaun le gaya
Leave a Reply