ik yahi raushni raushni imkan men hai
tu abhi tak dil-e-viran men hai
shor barpa hai tiri yadon ka
raunaq-e-hijr bayaban men hai
pyaar aur zindagi se lagta hai
koi zinda-dili be-jan men hai
aaj bhi tere badan ki ḳhushbu
tere bheje hue gul-dan men hai
zindagi bhi hai miri ankhon men
maut bhi dida-e-hairan men hai
dil abhi nikla nahin siine se
ek qaidi abhi zindan men hai
Leave a Reply