Farooq Engineer
baat men kuchh magar bayan men kuchh
rang badla har ek aan men kuchh
yuun hi qaa.em nahin hai ye duniya
log achchhe hain is jahan men kuchh
marsiya ho gaya charaghon ka
jab bhi likkha hava ki shaan men kuchh
qatl hone hain sab ke sab kirdar
moḌ aise hain dastan men kuchh
us ko dekha mili palak se palak
jaan si aa ga.i hai jaan men kuchh
sirf lutf-e-safar ki baat nahin
ab maza bhi kahan thakan men kuchh
sab samajhta hai apne matlab ki
koi bole kisi zaban men kuchh
kya bharosa hai us ka ai ‘faruq’
aan men kuchh hai aur aan men kuchh
Leave a Reply