ishq men har nafas ibadat hai
maz.hab-e-ishq adamiyat hai
ik zamana raqib hai mera
jab se hasil tiri rifaqat hai
zindagi naam ranj-o-gham hi sahi
phir bhi kis darja ḳhubsurat hai
ik mohabbat bhari nazar ke siva
aur kya ahl-e-dil ki qimat hai
chand muḳhlis jahan ikaTTha huun
vo jagah ahl-e-dil ki jannat hai
kaun suljha.e gesu-e-dauran
apni uljhan se kis ko fursat hai
ek duniya tabah kar Daale
ek zarra men aisi taqat hai
sitam-dost ho ki lutf dost
jo bhi mil jaa.e vo ghanimat hai
un ko dekhenge be-hijab ‘hafiz’
shauq-e-didar agar salamat hai
Leave a Reply