Chand-Taron Ka Tere Ru-Ba-Ru Sajda Karna

chāñd-tāroñ kā tire rū-ba-rū sajda karnā

ḳhvāb dekhā hai to kyā ḳhvāb kā charchā karnā

husn-e-barham se mirā arz-e-tamannā karnā

jaise tūfān meñ sāhil se kinārā karnā

raas aa.egā na ye koshish-e-bejā karnā

bad-gumānī ko baḌhā kar mujhe tanhā karnā

merī jānib se hai ḳhāmosh darīche kā savāl

kab se sīkhā tirī āvāz ne parvā karnā

har-qadam par mirī kāñToñ ne pazīrā.ī kī

jurm pūchho to bahāroñ kī tamannā karnā

dāvat-e-shoḳhī-e-taqdīr use kahte haiñ

kār-e-imroz na karnā ġham-e-fardā karnā

un kī mohtāt-nigāhī ne bharam khol diyā

jin ko manzūr na thā raaz kā ifshā karnā

vaqt ke hāthoñ meñ tiryāk bhī hai zahr bhī hai

us ko yak-rañg samajh kar na bharosā karnā

tarjumān-e-ġham-e-dil un kī nazar hotī hai

jin ko aatā nahīñ iz.hār-e-tamannā karnā

ḳhud-numā.ī nahīñ insān kī ḳhuddārī hai

parcham-e-azmat-e-kirdār ko ūñchā karnā

zulmat-e-jumbish-e-lab kī nahīñ ummīd magar

nigah-e-nāz na bhūlegī ishārā karnā

go maiñ yūsuf nahīñ dāman to mire paas bhī hai

tum zarā pairvī-e-dast-e-zuleḳhā karnā

ai ki tū nāzish-e-sannā.ī-e-dast-e-fitrat

kaash aatā na tujhe ḳhūn-e-tamannā karnā

jāda-e-ishq meñ ik aisā maqām aatā hai

shart-e-avval hai jahāñ tark-e-tamannā karnā

aap ke ahd-e-vafā par mirā īmāñ jaise

kisī girtī huī dīvār pe takiya karnā

koshish-e-zabt meñ har saañs qayāmat hai ‘urūj’

khel samjhe ho ġham-e-dil ko gavārā karnā

Leave a Comment