Urooj Zaidi Badayuni
chand-taron ka tire ru-ba-ru sajda karna
ḳhvab dekha hai to kya ḳhvab ka charcha karna
husn-e-barham se mira arz-e-tamanna karna
jaise tufan men sahil se kinara karna
raas aa.ega na ye koshish-e-beja karna
bad-gumani ko baḌha kar mujhe tanha karna
meri janib se hai ḳhamosh dariche ka saval
kab se sikha tiri avaz ne parva karna
har-qadam par miri kanTon ne pazira.i ki
jurm puchho to baharon ki tamanna karna
davat-e-shoḳhi-e-taqdir use kahte hain
kar-e-imroz na karna gham-e-farda karna
un ki mohtat-nigahi ne bharam khol diya
jin ko manzur na tha raaz ka ifsha karna
vaqt ke hathon men tiryak bhi hai zahr bhi hai
us ko yak-rang samajh kar na bharosa karna
tarjuman-e-gham-e-dil un ki nazar hoti hai
jin ko aata nahin iz.har-e-tamanna karna
ḳhud-numa.i nahin insan ki ḳhuddari hai
parcham-e-azmat-e-kirdar ko uncha karna
zulmat-e-jumbish-e-lab ki nahin ummid magar
nigah-e-naz na bhulegi ishara karna
go main yusuf nahin daman to mire paas bhi hai
tum zara pairvi-e-dast-e-zuleḳha karna
ai ki tu nazish-e-sanna.i-e-dast-e-fitrat
kaash aata na tujhe ḳhun-e-tamanna karna
jada-e-ishq men ik aisa maqam aata hai
shart-e-avval hai jahan tark-e-tamanna karna
aap ke ahd-e-vafa par mira iman jaise
kisi girti hui divar pe takiya karna
koshish-e-zabt men har saans qayamat hai ‘uruj’
khel samjhe ho gham-e-dil ko gavara karna
Leave a Reply