Talib Baghpati
lafz to milte nahin iz.har-e-mahsusat ko
ab vo samjhen ya na samjhen mere dil ki baat ko
dar-haqiqat tuur par muusa ko sujhi hi nahin
varna ankhen jazb kar letin tajalliyat ko
meri aage se haTa lo ya to ye mub.ham kitab
ya palaTne do mujhe auraq-e-maujudat ko
haa.e mat puchho mariz-e-gham ki kaifiyat-e-karb
niind kya ghaflat si ho jaati hi pichhli raat ko
meri aahon men ba-qaul un ke agar taqat nahin
charḳh se phir kyuun sitare TuTte hain raat ko
pahle to dil men ḳhuda jaane kidhar se aa chhupe
phir sitam ye hai ubhara mere mahsusat ko
tak raha hai phir koi hasrat se su-e-asman
phir kahin jazba na aa jaa.e tajalliyat ko
munh andhere jab jahan sota hai mad-hoshi ki niind
main suna karta huun saz-e-ruh ke naghmat ko
chandni ho ya andheri mujh ko ‘talib’ vasta
main to aafat hi samajhta huun hamesha raat ko
Leave a Reply