sarab-e-ma.ani-o-mafhum men bhaTakte hain
kuchh aise lafz jo shayad azal se pyase hain
sama.aton ko abhi yuun hi muntazir rakhna
pas-e-ghubar-e-ḳhamoshi hazar naghme hain
andhere kitne hi saffak hon ki zalim hon
magar charagh ki nannhi si lau se Darte hain
ye kis ḳhayal ki lau se lipaT rahi hai hava
ye kis ki yaad ke saa.e se thartharate hain
yahi nahin ki kisi yaad ne malul kiya
kabhi kabhi to yunhi be-sabab bhi ro.e hain
bikhar ke bhi to hamen a.ina hi rahna hai
harif-e-sang kahin TuTne se Darte hain
safar the paanv men ‘aslam’ to manzilen sar men
magar ab apni hi parchha.iyon se lipTe hain
Leave a Reply