ta-sahar ki hai fughan jaan ke ghafil mujh ko
raat bhar aaj pukara hai mira dil mujh ko
dard-o-gham se jo tapan tha vo mila dil mujh ko
is liye dafn kiya hai lab-e-sahil mujh ko
bar-e-husn aap se laila ka uthaya na gaya
na liya qais ne jis ko vo mila dil mujh ko
ghair phir ghair hain akhir hain phir apne apne
yaad karta hai tire paas mira dil mujh ko
bar-e-khatir hi agar hai to inayat kiije
aap ko husn mubarak ho mira dil mujh ko
fasl-e-gul aate hi sahra-e-adam ko pahuncha
rokte rah gae aghlal-o-salasil mujh ko
mar gaya ashk jo ankhon se bahe aah ke saath
aa gai niind hava men lab-e-sahil mujh ko
kya adavat hai ki jis din se hua huun zakhmi
dekh jaata hai vo rashk-e-mah-e-kamil mujh ko
shab ko tum soi thi kya su-e-falak munh kar ke
nazar aaya na sahar tak mah-e-kamil mujh ko
paanv tak zulf tiri yaar badh aai shayad
aaj bhari nazar aati hai salasil mujh ko
asar-e-zoaf se huun qatra-e-ashk-e-khuni
rahm kar de kafan-e-daman-e-qatil mujh ko